Fataawaa NuuralHudaa

2021-02-04 14:45:58 530: Waan hin taaneef kakachuun akkami?

Gaaffii: Namni tokko yoo kakate eegasii wanni irratti kakate suni dallanee kakate wanni inni irratti kakate sun dogongora jechuu beekee maal ta’uu qaba?

Deebisaa: Kaffaaraa godhuu qaba. Takkaa gabra bilisoomsuu, takkaa miskiina jaha nyaachisu, takkaa guyyaa sadi soomu. Gabra bilisoomsuun ammatti hin aragamu. Yookaa miskiina jaha nyaachisi yookaa guyyaa sadi soomani. Waan irraa kakatte sanillee yoo waan haraami hin ta’in dalagi.

Sheikh Abdurrahmaan Shariif ओपन / कमेंट

2021-02-04 14:45:24 529: Haadha tiyya ta islaama hin taane laaluunii ni danda’aa?

Gaaffii: Haati tiyya anaa diqqaa biyyaa na ariitee eega biyyaa fagaadhee islaama ta’ee haadha tiyya ta biyyaa na ariite sani laaluu ni danda’aa?

Deebisaa : Haati tee kaafirallee taatu, warri keessan kaafirallee ta’u keessaahuu haadhaaf abbaa kankee manxanfatuu qabda. Waan dandeettuun ka diinaa kankee madeessuu hin dandeenneen isaaniif tola ooluu ni dandeessa. Daliilli Asmaa bintu abubakar obboleettii Ayishadha Rasuula Rabbiititti dhufte madiinaadhatti. Wanni jetteen haadha tiyyatu ta kaafiraa magaalaa makka irraa kaatee natti duftee akka ani isiidhaaf tola barbaadu barbaaddi maal ta’aa jette. Haadha tanteetiif tola oolii jedheen Rasuuli ﷺ. anillee akkasuma siin jedha haadhaaf abbaa kankeetii tola ooli.

Sheikh Abdurrahmaan Shariif ओपन / कमेंट

2021-02-04 14:44:34 528: Namni tokkko yoo janaabee bishaan dhiqatuun dhabe akkamitti salaataa?

Gaaffii: Namni tokkko yoo janaabee bishaan dhiqatuun dhabe akkamitti salaataa?

Deebisaa: Tayamuumee salaata. Tayammuuma godheeti salaata. Egeri yeroo bishaan aragate ni dhiqata. Salaata taymuumaan salaate sanillee wayta bishaan aragate hin deebisu.

Sheikh Abdurahman Shariif ओपन / कमेंट

2021-02-04 14:43:10 527: Salaata gabaabsuun yoom eeyyamama ?

Gaaffii: Namni tokko yoo imala deeme biyya haga 200km fagaatu salaata ni gababsa moo hin guutaa yoo guute Rakkoo qabaa? Imala san keessatti sunnaan salaatuun ni danda’amaa? Guyyaa tokko keessatti kilometirii 20 deemaa yookaa kilometirii 25 deemaa.

Deebisaa: Namni islaamaa tokko yoo imalaaf deeme; ulamaa’iin shaafi’iyyaadhaa haga kilometirii 80 wayi imaltuun isaa sun yoo ka taatu taate salaata gabaabsuun ni danda’a, guutateellee salaatuu danda’a diliin isarra hin jirtu. Garuu eega imaltuu taate gabaabsee salaatutu isaaf gaari. Maaliif ruksaa Rabbiiti. Rasuulli kenya waan jedhe ﷺ Ruksaa Rabbiin keenya isiniif godhe ruksaa Rabbii keessanii fudhadhaa jedhe. Kanaafuu salaata gabaabsuun ruksa. Sunnaallee yoo ka salaatuu dandeettuu salaatuu ni dandeessa humaa hin qabu. Maaliif jennaan Rasuulli sunnaa fajrii yookan subii raka’aa lamaan salaata subhii duraa takkaa dhiisee hin beekuu jedhan wayta ganda isaa jiruuf imaltuu keessattillee. Salaatuleeylillee salaatuu ture Rasuulli Rabbii ﷺ, witrii fa’a salaatuu ture imaltuu keessatti. Kanaafuu sunnaan sunna yoo ka dandeettee ka salaattu taate. Wanni sirraa gabaabsaniif dadhabbii sirraa buusuuf.yoo ka dadhabbii hin qabne taate kaanillee lama lama salaatattee sunnaallee yoo salaatatte humaa hin qabu.

Sheikh Abdurrahmaan Shariif ओपन / कमेंट

2021-02-04 14:41:59 526: Gaafa xiqqoodhaa haadha tiyyarraa mallaqa hataa maal godhuu qaba?

Gaaffii: Gaafa xiqqoodhaa haadha tiyyarraa mallaqa hataa maal godhuu qaba?

Deebisaa: Ummaa tanteetiin dhiifama naa godhi jedhiin. Naaf irra dabri jedhiin. Yoo ka hin jiraatin taate, araarama kadhadhuufii waa sadaqadhuuf inshaallah.

Sheikh Abdurrahmaan Shariif ओपन / कमेंट

2021-01-24 07:31:16 525: Maallaqa karaa abbaan maallaqaa hin beeyneen deebisuufiin ni taatii?

Gaaffii: Nama tokko ka mallaqni isaa osoo hin beeyne na seena karaa inni hin beeyneen kunnuufii ni danda’aa moo masjiida geessa?

Deebisaa: Ee ni dandeessa. masjiida hin geessiinii eega abbaa ka beeytu taate yaa aboo horii kanatu akkanatti na waliin deemee hoo jedhii ufirraa kenniif. Yoo ka sodaattu taate karaa inni hin beeyne saniin kenniif.

Sheikh Abdurrahmaan Shariif ओपन / कमेंट

2021-01-24 07:31:08 524: Nikaha malee daa’imummaan dubra heerumte toowbaan isii maali?

Gaaffii: Nama tokkotu nikahaan malee na fuudhee, anaa diqqoodhaa haati tiyya duutee warra keennatu anaa diqoodhaa na kennee, eega guddadhe booda namtichaan wal jaalanne; ati amma haadha hin qabduu ta si gurgurtu akkanumatti fudhadhee manatti siin gala jedhe eega anillee jaaladhe fuudhee manatti naan galatee jette, na fuudhee. Toowban keenna maali?

Deebisaa: Si hin fuunee zinaa sitti godhe, zinaan wajji galtan, zinaan wajji jiraattan. Yoo ka sirraa hore taate karaa zinaatiin waliin hortan. Maqaa bareedaa shariyaa san hin kenninaafii. Na fuudhe hin jedhinii zinaa natti godhe jedhi. Maaliif jennaan Maqaa shariyaadha kennaniif shariyaan islaama fuudha jedhan, heeruma jedhan. Maqaa bareeda islaamni kenneef. Ammoo ka zinaa zina fuudhaa miti. Kanaafuu Rabbiin Qur’aana keessatti maal jedha zinatti hin dhihaatinaa maaliif jennaan inni haalaan waan hamaadha ta’e. Kanaafuu maqaa fokkataaf maqaa bareedaa hin kenninaafii. Toowbaan keessan baatii takka addaan fagaattanii bakka bakka jiraattanii. Baatii takkaan booda akka haarawatti warra keessan irraa si kadhatee haarawatti warri keessan nikaha si godhee si fuudhuu qabaa. Sana booda araarama kadhadhaa Rabbii keessan. Toowbaan sharxii sadi qabdi. Takka waan duraan dalagaa turtan sani irraa buqqa’uu, lamaffaa sheenawuu dalagaa teessan ta zinaa sanirraa, murteeffatuu akka itti hin deebine. Rabbiin isinii araarama inshallah. Ammarraa yoo dhaamsi kiyya kun isin dhaqqabe namticha sani wajji jiraachuu hin qabdanii addaan bahaa. Ka san irra daranii gaafa dhiirsi kiyya fudhate manatti naan gale warri isaa hoolaa qalanii kallacha na dibanii jetti Sun shirkiidha . Toowbaa barbaachisa gama Rabbii deebi’aa. Ilmoon yoo dhalattellee ilmoon sun ilmoo zinaati yoo nikaahni hin jiraatin. Wonni isinirraa argamte hundi baaxila jechu.

Sheikh Abdurrahmaan Shariif ओपन / कमेंट

2021-01-24 07:30:57 523: Qissaa ambiyootaa laaluun ni danda’amaa?

Gaaffii: Qissaa ambiyootaa laaluun ni danda’amaa?

Deebisaa: Ee laaluun ni danda’ama humaa hin qabu. Qissaa ambiyootaa yoo laalteef yoo qaraate takkuma garaagarummaa hin qabu. Garuu wanni beekuu qabdu ka amma televizyiina irratti muldhisanii dabarsan kunniin fakki malee ambiyootaa miti. Rasuulaaf kulafaa’u raashidoota fakkii hin godhanii ni gurraachessan kabajaa isaaniitiif jecha. Ammoo sahabaa kaaniif ummata kaafiraa ka isaan wal lolaniiniin fakkii godhan kana laaluun ni danda’ama humaa hin qabu. Garuu kun fakiidha malee dhugaadhan nama isaan fakii godhan sani jettee hin amanin.

Sheikh Abdurrahmaan Shariif ओपन / कमेंट

2021-01-24 07:30:50 522: Hijaaba gubbaan haqachuun (quyyifachuun) ni danda’amaa?

Gaaffii: Yeroo wuda’atan osoo hijaaba mataa irraa qabu mataa gubbaa tuqachuun (haqatuun) ni danda’amaa?

Deebisaa: Ee ni danda’ama. Mataa akkaataa saditti haqachuun ni danda’ama. Mataa haquun dirqama irraahi. Waan jedhu Rabbiin SW yaa warra Rabbitti amane hoo; wayta salaatuu barbaaddan wodda’adhaa, fuula keessan dhiqaa; fuula wayta jedhan fuula guutuu dhiquu qabda, harkallee haga ciqiletti dhiqaa jedha Rabbiin SW , akkasuma mataa keessanillee rifeensa haqaa jedha. Haquu kana ulamaa’iin irratti wal kilaafan, imaamu shaafi’iin wanni jedhe mataa kankee irraa rifeensuma tokko yoo bishaan dhaqqabsiifte haqxee jirtaa jedha. Kilaafa dheeraa ulamaa’ii san keessa hin seeninii, mataa kankee gara fuula duraa kana haquu dandeessa takka, akka sunnaa Rasuulaa ﷺ hadiisni hedduun itti dhufu mataa guutuu haquudha rifeensa mataa kankee cufa jiidha harka kankeetii dhaqabsiisuun barbaachisaadha. Yoo mataa guftaan irra jiraate yookaan fooxaan wayii irra jiraate yoo dhiirtillee si wajjiin jiraatan ka ati mataa kankee rifeensaa bishaan waliin gahuu hin dandeenne gara fuula duraa kana tuqsiisteetiin guftaa san gubbaadhaan gad geessita jechudha. Akkasuma ammallee ka rifeensa tokkollee hin tuqsiisne guftaa gubbaan haquunilleen ni danda’ama.

Sheikh Abdurrahmaan Shariif ओपन / कमेंट

2021-01-24 07:30:39 521: Istinjaan duratti harka dhiqachuun barbaachisaadhaa?

Gaaffii: Wayta mana sagaraa seenaan istinjaa osoo hin godhiniin duratti harka dhiqatuun barbaachisaadhaa? Namatuu osoo istinjaa hin gooneen duratti harka dhiqatuun barbaachisa naan jedhee akkasitti namaan wal moromnee harka dhiqatuun osoo istinjaa hin gooneen duratti barbaachisaa hadiisa irra jiraa?

Deebisaa: Yoo namni tokko yoo ka janaabaa qabu taate, booda yoo ka dhiqatuu barbaadan taate osoo istinjaa hin gooneen duratti harka dhiqatuu qaban. Sunillee sunnaadha dirqamaa miti garuu sunnaa rasuulaati ﷺ. rasuulatu ﷺ akkas dalage. Namni gariin sunnaa barabaaduuf akka rasuulli ﷺ dalage dalaguuf akkasi dalaga namani gariin. Ammoo ka dirqamaa istinjama gootee achi booda wodda’attee dhiqattaa jechu. Garuu wayta nagayaa osoo istinjaa hin godhiniin duratti harka dhiqachuun barbaachisaa miti. Istinjaa gootee yoo ka harka kankee irratti ka waa hafanii sodaattu taate saamunaa dibattee harka ufirraa dhiqxaa kana malee wanni dirqamaa ka bairaa wanni sirra jiru hin jiru jecha.

Sheikh Abdurrahmaan Shariif ओपन / कमेंट