2022-06-21 08:41:54
ජීවිතය වෙනස් කරවන අභිප්‍රේරණ කතා එකතුව - සංදීප ජයසේකර
කතා 3 - සමුරායිවරයා සහ සෙන් හාමුදුරුවෝ
ඈත අතීතයේ වීර සමුරායිවරයෙක් ජීවත් වුණා. එයා රට වෙනුවෙන් තමුන්ගේ ජීවිතේ පරදුවට තියලා සටන් කරලා රට ආරක්ෂා කළා. සටන් ගණනාවකදී එයා රට වෙනුවෙන් පෙන්නපු නිර්භීතබව නිසා රටේ ශ්‍රේෂ්ඨ වීරයෙක් විදිහට මිනිස්සු එයාට සළකන්න ගත්තා.
දවසක් මේ සමුරායිවරයා සෙන් හාමුදුරුනමක් මුණ ගැහෙන්න සෙන් පන්සලකට ගියා. එයා යන කොට පන්සලේ මහා විශාල සෙනගක් හිටියා. ඒ හැමෝම සෙන් හාමුදුරුවන්ට පුදුම ගෞරවයකින් සැළකුවා. හැමෝම කතා කළේ සෙන් හාමුදුරුවන්ගේ කරුණාවන්තකම ගැන, දහම ගැන තියන දැනුම ගැන, හිතාගන්න බැරි බුද්ධි මහිමය ගැන සහ අනික් අයව මනසින් සුව කරන ශාන්තබව ගැන.
ඒ ආපු කිසිම කෙනෙක් සමුරායිවරයා ගණන් ගත්තේවත් නෑ. සමුරායිවරයා ඉන්නවා කියලාවත් කාටවත් දැනුනේ නෑ. සමුරායිවරයා කල්පනා කරන්න පටන් ගත්තා. "මාව කවුරුවත් ගණන් ගන්නේ නෑ නේ. ඔක්කොම ගෞරව කරන්නේ, සළකන්නේ අර සෙන් හාමුදුරුවන්ට නේ. මං අවුරුදු ගාණක් රට වෙනුවෙන් මගේ ජීවිතේ අවදානමක දාගෙන සටන් කළාට කිසි වැඩක් නෑ නේ. මීට වඩා හොඳයි මාත් සෙන් හාමුදුරුකෙනෙක් වුණා නම්" මේ විදිහට හිතමින් දුක් වෙන්න පටන් ගත්තා. සමුරායිවරයා සෙන් හාමුදුරුවෝ ගාවට ගිහින් මේ ප්‍රශ්නේ කිව්වා. හාමුදුරුවෝ කිව්වා "මං ඔබට උපදේශයක් දෙන්නම්, හැබැයි පන්සලේ සියළුම දෙනා යනකන් ඔබට ඉන්න වෙනවා."
ටිකෙන් ටික වෙලා ගිහින් රාත්‍රිය උදා වුණා. අන්තිමම කෙනාත් පන්සලෙන් ගියාට පස්සේ සෙන් හාමුදුරුවෝ ගියා සමුරායිවරයා හම්බ වෙන්න. සෙන් හාමුදුරුවෝ සමුරායිවරයාගෙන් ඇහුවා
"සමුරායිතුමනි, රෑ අහසේ ලස්සනට පායලා තියන හඳ ගැන ඔබ මොකක්ද හිතන්නේ?".
"හාමුදුරුවනේ, හඳ හරිම සෞම්‍යයි. හඳෙන් එන එළියත් එක්ක දැනෙනවා පුදුම සිසිලසක්. ඒ හඳ එළිය නිසා අපිට රෑ අහසේ අඳුර ටිකක් හරි අඩු වෙලා දැනෙනවා. හඳ පායලා තියෙනකොට රෑ අහස හරි ලස්සනයි".
"බොහොම හොඳයි සමුරායිතුමනි. ඔබට දහවල් ඉර ගැන මොකද හිතෙන්නේ?"
"හඳ වගේ නෙවෙයි. ඉර හරිම තේජාන්විතයි. අපිට ඉර දිහා බලන්න බැරි තරම් ඉර එළිය ප්‍රබලයි. ඉර එළියෙන් දෙන ඒ එළිය නිසා අපිට හැමදේම හොඳට පේනවා. ගහකොළ හැදෙන්නේ, අපි වගා කරන්නේ, අපිට යන්න එන්න පේන්නේ ඉර එළියෙන්."
"සමුරායිතුමනි, ඉරයි හඳයි දෙකෙන් හොඳ මොකක්ද කියලා මට කියන්න පුළුවන්ද?".
"හාමුදුරුවනේ, ඉරයි හඳයි දෙක සංසන්දනය කරන්න බෑ නේ. ඉරෙන් කෙරෙන්නේ වෙනම වැඩ කොටසක්, හඳෙන් කෙරෙන්නේ වෙනම වැඩ කොටසක්. ඒ නිසා මට එකක් හොඳයි කියන්න බෑ".
සෙන් හාමුදුරුවෝ සිනා මුසු මුහුණින් මෙහෙම කිව්වා
"සමුරායිතුමනි, ඔබ හරි. ඉරයි හඳයි කියන්නේ වෙන වෙන අරමුණු තියන, වෙන වෙන කාර්‍යයන් කරන දෙන්නෙක්. ඒ දෙන්නාව සංසන්දනය කරන්න බෑ. ඒ වගේම තමා ඔබත් මාත්. ඔබ රට වෙනුවෙන් සටන් කරපු, රට වෙනුවෙන් ජීවිතය පරදුවට තබපු ශ්‍රේෂ්ඨ වීරයෙක්. මම මිනිසුන්ගේ යහපත වෙනුවෙන් සෙන් දහම කියාදෙන කාරුණික වීම අර්ථයෙන් කියාදෙන ශාස්තෲවරයෙක්. අපි දෙන්නා වෙනස්. අපි දෙන්නාගේ අරමුණු වෙනස්. අපි දෙන්නාගේ කාර්‍යභාරය වෙනස්. අපි එකිනෙකාට වෙනස් ක්ෂේත්‍රවල ප්‍රවීණත්වයට පත්වෙලා තියනවා. අපි දෙන්නාව සංසන්දනය කරන්න බෑ. ඒ නිසා ඔබ දුක් වෙන්න එපා. ඔබේ ක්ෂේත්‍රය ඇතුලේ, ඔබ මිනිසුන්ගෙන් සැළකුම් ලබන ගෞරවයට පාත්‍ර වෙන වීරයෙක්. ඒ ගැන ඔබ සතුටු වෙන්න. වෙන අරමුණක් තියන, වෙනත් වැඩ කරන, වෙනත් ක්ෂේත්‍රයක වෙනස් කෙනෙක් එක්ක සංසන්දනය කරලා දුක් වෙන එක තේරුමක් නැති වැඩක්"
සෙන් හාමුදුරුවෝ ඔබටත් මටත් හරි අපූරු පණිවිඩයක් කියලා දෙනවා. අපිත් විවිධ අයත් එක්ක අපිව සංසන්දනය කරලා, මට බැරි වුණා නේ මේ වගේ වෙන්න. මට මෙයාට තරම් දේවල් නෑ නේ. මට මෙයාට වගේ කවුරුවත් සළකන් නෑ නේ. මට මෙයාට තරම් ගෞරව කරන් නෑ නේ කියලා පසු තැවෙන අවස්ථා එනවා. හැබැයි අපි තේරුම් ගන්න ඕනි, මිනිස්සු වෙනස්. එයාලගේ අරමුණු වෙනස්, එයාලගේ කාර්‍යභාර වෙනස්, එයාලා ක්‍රියාත්මක වෙන වපසරි වෙනස්. අපි උත්සාහ කරන්න ඕනි අපේ අරමුණ, අපේ කාර්‍ය, අපේ වපසරිය ඇතුලේ විශිෂ්ටයෝ වෙන්න. අපිට අදාළම නැති ක්ෂේත්‍රයක කෙනෙක් එක්ක සංසන්දනය කරලා දුක් වෙන එක ඇත්තටම තේරුමක් නැති දෙයක්. ඒක හරියට ඉරයි හඳයි සංසන්දනය කරන්න බෑ වගේ තමා.
215 viewsS.A.අබේසිංහ -AHT/5816, edited 05:41
ග
