2021-11-01 08:17:56
कोकण, मध्य महाराष्ट्रात पावसाचा अंदाज सौजन्य : अॅग्रोवन
दिनांक : 01-Nov-21
पुणे : किमान तापमानाचा पारा घसरल्याने थंडीची चाहूल लागली असतानाच, राज्यात पावसाला पोषक हवामान होत आहे. आज (ता. १) कोकण, मध्य महाराष्ट्राच्या दक्षिण भागात तुरळक ठिकाणी विजा, मेघगर्जना, जोरदार वाऱ्यासह पावसाचा अंदाज हवामान विभागाने वर्तविला आहे.
श्रीलंका आणि तमिळनाडू किनाऱ्यालगतच्या समुद्रात कमी दाबाचे क्षेत्र सक्रिय असल्याने सध्या दक्षिण भारतातील राज्यांमध्ये जोरदार पाऊस सुरू आहे. कोकण, मध्य महाराष्ट्र आणि मराठवाड्याच्या जिल्ह्यांमध्येही पावसाला पोषक हवामान होत आहे. आज (ता. १) कोकण आणि मध्य महाराष्ट्राच्या दक्षिण भागात ढगाळ हवामानासह पावसाची शक्यता आहे.
गेल्या काही दिवसांपासून राज्यात मुख्यत: कोरडे हवामान आहे. उत्तरेकडून येणाऱ्या थंड वाऱ्यांमुळे किमान तापमानात घट झाली आहे. रात्री वाहणाऱ्या जोरदार वाऱ्यामुळे अधिकच थंडी जाणवू लागली आहे. पावसाला पोषक हवामान होताच किमान तापमानात थोडीशी वाढ झाली. राज्यात बहुतांशी ठिकाणी किमान तापमानाचा पारा पुन्हा १५ अंशांच्या वर गेला आहे. रविवारी (ता. ३१) जळगाव येथे नीचांकी १२.८ अंश सेल्सिअस तापमानाची नोंद झाली.
दुपारच्या वेळेस उन्हाचा चटका कायम असून, ढगाळ हवामानामुळे उकाडाही जाणवत आहे. रविवारी सकाळपर्यंतच्या २४ तासांमध्ये रत्नागिरी येथे उच्चांकी कमाल ३६ अंश सेल्सिअस तापमानाची नोंद झाली. उर्वरित राज्यात कमाल तापमानाचा पारा ३० ते ३४ अंशांच्या दरम्यान आहे.
रविवारी (ता. ३१) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे ३१.३ (१६), नगर ३२.४ (-), जळगाव ३२ (१२.८), कोल्हापूर ३२.३ (२२.७), महाबळेश्वर २७.२ (१५.७), मालेगाव ३३ (१८), नाशिक ३०.३ (१४.२), सांगली ३४.२ (२१.८), सातारा ३१.१ (१९.७), सोलापूर ३४.२ (१९.३), सांताक्रूझ ३५.३ (२४), डहाणू ३३.८ (२२.२), रत्नागिरी ३६ (२३.९), औरंगाबाद ३०.८ (१५.२), नांदेड ३२.४ (१८.१), परभणी ३१ (१६.८), अकोला ३२.० (१६.०), अमरावती ३२ (१५.२), ब्रह्मपुरी ३३.४ (१५.३), बुलडाणा २९ (-), चंद्रपूर ३१.४ (२०), गडचिरोली ३२.४ (१८.८), गोंदिया ३०.८ (१५.८), नागपूर ३२ (१४.७), वर्धा ३१.६ (१५.६), यवतमाळ ३१.५ (१४.५)
विजा, मेघगर्जनेसह पावसाचा इशारा (येलो अलर्ट)
कोकण : सिंधुदुर्ग, रत्नागिरी
मध्य महाराष्ट्र : कोल्हापूर, सांगली, सातारा
महाराष्ट्रातील प्रमुख बाजारपेठेतील शेतमालाचे बाजारभाव जाणून घेण्यासाठी आजच कृषि विज्ञान केंद्र, बारामतीचे मोफत कृषिक अॅॅप पुढे दिलेल्या लिंक वरून त्वरित डाऊनलोड किंवा अपडेट करून घ्या. https://play.google.com/store/apps/details?id=com.rtc.krushik&showAllReviews=true
295 views05:17