राज्यावर पुन्हा पावसाचे सावट सौजन्य : लोकसत्ता दिनांक : 27- | कृषिक अँप Krushik app

राज्यावर पुन्हा पावसाचे सावट

सौजन्य : लोकसत्ता
दिनांक : 27-Dec-21

पुणे : कमी दाबाच्या पट्टय़ामुळे राज्यावर २८ डिसेंबरपासून पुन्हा पावसाचे सावट आहे. मराठवाडा आणि विदर्भात काही ठिकाणी गारपीट आणि विजांच्या कडकडाटात पाऊस, तर उत्तर महाराष्ट्रात काही ठिकाणी हलक्या पावसाची शक्यता आहे. कोकण विभागात मात्र हवामान कोरडे राहील, असा अंदाज हवामान विभागाने व्यक्त केला आहे.
महाराष्ट्रासह उत्तर आणि मध्य भारतातही अनेक ठिकाणी या काळात पाऊस होणार आहे. डिसेंबरच्या सुरुवातीला अरबी समुद्रातील कमी दाबाच्या क्षेत्रामुळे राज्यात बहुतांश भागात पाऊस झाला. दुसऱ्या आठवडय़ापासून कोरडे हवामान निर्माण झाले. त्यानंतर उत्तरेकडून थंड वाऱ्यांचे प्रवाह येऊ लागल्याने काही प्रमाणात थंडी अवतरली. विदर्भात दोन ते तीन दिवस थंडीची लाट होती. मात्र उत्तरेकडून येणारे थंड वाऱ्यांचे प्रवाह मंदावल्यानंतर तापमानात काही प्रमाणात वाढ झाली.
सध्या उत्तर भारतामध्ये वाऱ्यांची चक्रीय स्थिती आहे. या भागात कमी दाबाचा एक पट्टा तयार होणार आहे. त्याचप्रमाणे दक्षिण-पश्चिम राजस्थान ते थेट विदर्भापर्यंत कमी दाबाचा एक पट्टा तयार होतो आहे. हा पट्टा पूर्व राजस्थान आणि पश्चिम मध्य प्रदेश ओलांडून येणार आहे. त्याचा परिणाम म्हणून या सर्व भागांसह महाराष्ट्रातही २८ आणि २९ डिसेंबरला काही भागांत पावसाचा अंदाज देण्यात आला आहे. महाराष्ट्रासह पंजाब, हरियाणा, चंडीगड, दिल्ली, राजस्थान, उत्तर प्रदेश, छत्तीसगड, बिहार, झारखंड, ओडिसा, पश्चिम बंगाल या राज्यांतही २७ डिसेंबरनंतर दोन ते तीन दिवस हलक्या ते मध्यम स्वरूपाच्या पावसाची शक्यता आहे. मराठवाडय़ात काही भागांत २८ डिसेंबर, तर विदर्भात काही भागांत २८ आणि २९ डिसेंबरला गारा पडण्याचा इशारा हवामान विभागाने दिला आहे. राज्यात सध्या जवळपास सर्वच ठिकाणी रात्रीचे किमान तापमान सरासरीपेक्षा काही प्रमाणात अधिक आहे. त्यामुळे रात्री हलका गारवा जाणवतो आहे. पावसाळी स्थितीत तापमानात आणखी वाढ होण्याची शक्यता आहे.
गारपीट, पाऊस कुठे?
हवामान विभागाच्या अंदाजानुसार, २८ आणि २९ डिसेंबरला नागपूर, वर्धा, भंडारा, गडचिरोली, अमरावती, चंद्रपूर आदी जिल्ह्यांत काही भागांत विजांच्या कडकडाटासह पाऊस आणि काही भागांत गारपीट होण्याची शक्यता आहे. मराठवाडय़ात परभणी, बीड, हिंगोली. नांदेड, लातूर जिल्ह्यांत तुरळक भागात गारपीट होण्याची शक्यता आहे. उस्मानाबादमध्ये २९, ३० डिसेंबरला पावसाचा अंदाज आहे. उत्तर महाराष्ट्रात धुळे, जळगाव, नाशिक आदी जिल्ह्यांत २८ डिसेंबरला हलक्या पावसाची शक्यता आहे.
आजच आपली “कृषिक प्रदर्शन २०२२” साठी नाव नोंदणी करण्यासाठी कृषि विज्ञान केंद्र, बारामतीचे मोफत कृषिक अॅप पुढे दिलेल्या लिंक वरून त्वरित डाऊनलोड करून घ्या.
https://play.google.com/store/apps/details?id=com.rtc.krushik&hl=en