मॉन्सून रविवारपर्यंत अंदमानात; नैर्ऋत्य मोसमी वाऱ्यांसाठी पोषक | कृषिक अँप Krushik app

मॉन्सून रविवारपर्यंत अंदमानात; नैर्ऋत्य मोसमी वाऱ्यांसाठी पोषक हवामान

सौजन्य : अॅग्राेवन
दिनांक : 13-May-22
पुणे : बंगालच्या उपसागरातील ‘असानी’ चक्रीवादळ निवळत असतानाच अंदमान निकोबार बेट समुहावर नैर्ऋत्य मोसमी वारे (मॉन्सून) दाखल होण्यास पोषक हवामान झाले आहे. रविवारपर्यंत (ता. १५) मॉन्सून दक्षिण अंदमान समुद्र आणि लगत असलेल्या आग्नेय बंगालच्या उपसागरात दखल होण्याची शक्यता हवामान विभागाने वर्तविली आहे.
दीर्घकालीन आगमनाच्या वेळा लक्षात घेता साधारणत: मॉन्सून साधारणत: २१ मे पर्यंत अंदमानाची राजधानी पोर्टब्लेअर येथे पोचतो. त्यापूर्वीच तो दक्षिण अंदमान समुद्रात दाखल होतो. तर १ जूनपर्यंत केरळमध्ये मॉन्सून डेरेदाखल होतो. यंदा १५ मे रोजी मॉन्सून अदमान समुद्रात दाखल होण्याची शक्यता आहे. गतवर्षी २१ मे रोजी मॉन्सूनने अंदमान बेटांचा बहुतांशी भाग व्यापला होता. तर ३ जून रोजी केरळमध्ये दाखल झालेला मॉन्सून अवघ्या दोन दिवसात (५ जून) महाराष्ट्रात दाखल झाला होता.
यंदा नैर्ऋत्य मोसमी वाऱ्यांच्या (मॉन्सून) हंगामात जून ते सप्टेंबर या कालावधीत यंदा ९९ टक्के पाऊस पडण्याचा अंदाज भारतीय हवामानशास्त्र विभागाने (आयएमडी) १४ एप्रिल रोजी जाहीर केला. या अंदाजात पाच टक्के कमी-अधिक पाऊस पडण्याची शक्‍यताही गृहीत धरण्यात आली आहे. मॉन्सून हंगामात ला-निना स्थिती राहण्याची शक्यताही हवामान विभागाने वर्तविली आहे. मॉन्सूनच्या केरळातील आगमनाचा मुहूर्त हवामान विभागाकडून लवकरच जाहीर केला जाईल. तसेच मे महिन्याच्या अखेरीस मॉन्सून हंगामाचा सुधारित दीर्घकालीन अंदाज व विभागानिहाय पावसाचे वितरण स्पष्ट होणार आहे.
‘असानी’ चक्रीवादळ निवळले : बंगालच्या उपसागरात आलेले ‘असानी’ चक्रीवादळ निवळत असून, आंध्रप्रदेशच्या किनाऱ्यावर कमी दाब क्षेत्र सक्रिय आहे. ही प्रणाली आज (ता. १३) निवळणार असून, आंध्रप्रदेश, रायलसीमा भागात जोरदार पावसाची शक्यता आहे. तर महाराष्ट्र आणि दक्षिण भारतातील राज्यामध्ये ढगाळ हवामान असून, काही ठिकाणी हलक्या ते मध्यम पावसाची शक्यता आहे.
अॅग्रीकल्चरल डेव्हलपमेंट ट्रस्ट संचलित कृषी विज्ञान केंद्र, बारामतीचे शेतकऱ्यांसाठी मोफत “कृषिक अॅप” खाली दिलेल्या लिंक वरून डाऊनलोड करा आणि हवामान अंदाज, कृषि व जोडधंदे सल्ला, बाजारभाव, तज्ञांचे लेख,कृषि गणकयंत्र, इतर कृषिविषयक उपयुक्त माहिती मिळवा.
https://play.google.com/store/apps/details?id=com.rtc.krushik&hl=en